Conseils pour TOUR 2 | بعض النصائح للدورة الثانية

أعملتلكم فيديوات خاصة كان لرواد الموقع هذا على اليوتيوب فسرت فيه المقالات الكل ، إنزل لهنا واشترك في القناة الساعة بش تتحلك الفيديوات ++> https://goo.gl/b2XK3e ____________________________________________________________________________

السلام عليكم ، أول ما نبدا كلامي نقلكم إلي عندو استفسار يكتبها كومنتار تحت المقال ، هذا خاص باك 2015 مبعد ما تطلع نتيجة باك 2016 تو نعملوا تحديث للمقال  ؛ حبيت نقول إلي جماعة الدورة الثانية أنا مانيش ناسيكم ،المقال هذا بش نسميه : "غليتو علينا الخبز" ، شكون غلا على شكون ياخي؟ ماو جماعة تفادي النزول لحكينا عليهم المرة لي فاتت في مقال هذا  غلو الخبز علا جماعة الرابطة الثانية ، إتصورو فما 681 واحد تأجلو لدورة الثانية على خاطر كي نوصيو ونعاودو باش ماتحطوش حاجات أقوى منكم و هي هي حطو 10 اختيارات فوق سكورهم !!!! برشا مسجات جاوني عل ايمايل والله سخفوني خاطر كان معمل ومحطي أفاق على حاجة تطلع حسبة أخرى !!! خسارة ! باك غريبة والله ، نجحو أقل عباد أما السكرات طلعوا للسما ، الله غالب ملا زهر عندكم ، الدورة لولا صفحة وطويناها ، الدورة الثانية حسب ما نشوف ، باش يتظلموا فيها أكثر جماعة الدورة الثانية الأصليين ، خاطر برشة طاحو من الديفزيون 1 للثانية و باش تكون عندهم الأولوية خاطر السكورات متاعهم أكبر من غيرهم . لكن في الحالتين الناس الكل مش باش توصل لحاجة باهية ، أو نقولو "معروفة باهية" لأن أغلب الشعب الباقية هي شعب إما جديدة أو مش معروفة برشة في الأفاق .

بالنسبة لإعادة التوجيه ، حسب ما نشوف ممكن 40% من الدورة الاولى بش يعملوها خاطر برشا عباد مش راضية بالأختيار لخذاتو ، هذاك علاش كما قلت في عنوان ستاتي تغلوا فالخبز علا رواحكم ، وكل واحد مش حاس بخوه وأفكر لمصلحتو وهذا طبيعي وعادي جداً ، أما كل ما ازيد عدد إلي بش يطلبوا إعادة التوجيه كل ما الفرص تقل ويستغلوها جماعة التراتيب الاولى علاش  ؟ خاطر فما طاقة إستيعاب معينة أقل من الدورة الأولى باش يحطوها لكل شعبة و أعلى السكورات المترشحة لها باش يقبلوهم ، في الأصل دورة اعادة التوجيه للناس إلي كانوا يخلطوا على حاجة ما خير أما صارت غلطة أو بدلو رايهم .. ليوم نلقاو إلي الأغلبية مش راضية حسب المسجات لي تجيني ، وبالمناسبة نقدم إعتذاري لكل واحد بعثلنا مساج وما جوبناهوش خاطر المسجات عندنا بالمئات في ايمايل موقعنا  ، بالله نحب نوصل نداء صغير للناس إلي خذات حاجة باهية و ناوية تعمل إعادة توجيه "على الجو" (بما انو مفتوح للناس الكل بدون إستثناء ) " ‫#‏القناعة‬" باهية مش لازم تعدي دورة إعادة التوجيه إذا كان ‫#‏عاجبتك‬ شعبتك و ‫#‏راضي‬ تكمل فيها ، خاطر البلاصة إلي باش تاخوها إنت و إلي ممكن برشة ما تقراش فيها أما تقرا في الأولى باش تضيعها على غيرك إلي مستحقلها و ممكن تقرر ‫#‏مستقبلو‬ . ‫#‏غليتو‬ على بعضكم الخبز في النجاح و في الدورة الأولى و توا الدورة الثانية ما تكملوش تعملوها في إعادة التوجيه ، الوضع بالحق مش متى لعب و البلاصة بحسابها .
نداء هذا إنساني مش إجبار لحد، كلام للناس إلي خذات توجيه باهي وراضية به ، "حسو بغيركم " ، بقرار منك ممكن تحرم إنسان آخر انو يكمل قرايتو أو تخسرو في عام حرام .. سهلوها ما تصعبوهاش .
نداء آخر لجماعة الدورة الأولى إعاونو زملائهم متاع الدورة الثانية ، خاطر عندهم فكرة نتصور وإنجمو إعاونو بعضهم .

تذكير : إعادة التوجيه من 30 جويلية ل 09 أوت 2015 : النتيجة 31 أوت