Concours de reorientation MARS 2017 (Specialités et Contenu) | مناظرة إعادة التوجيه مارس 2017 (الأختصاصات و محتوى الكونكور)

أعملتلكم فيديوات خاصة كان لرواد الموقع هذا على اليوتيوب فسرت فيه المقالات الكل ، إنزل لهنا واشترك في القناة الساعة بش تتحلك الفيديوات ++> https://goo.gl/b2XK3e ____________________________________________________________________________

1-شنوة تريفز في الكونكور ؟
بالنسبة لشنوة تريفيزو في الكونكور ....كنت فسرت في الفيديو لكن ميسالش نزيد نفسر ....باهي عندك فما شعب فاهم اختبار شفاهي أو تقني و تلقاو دجا في calendrier تفسير لاختبار هاكم ....و بالنسبة لاختبار متع الثقافة عامة هو عبارة عن تعبير كتابي بالفرنسية أو العربية (انتي و الشعبة ) ، بالنسبة لجماعة سبور يامنعاش تو هبطلكم كيفا تعديو بالضبط ....بالنسبة لطب ...هاكم تراجعو برنامج باك علوم ..معناها واحد باك مات يريفز برنامج باك علوم .....بالنسبة لباقي الاختبارات ...مثال فما شعبة اسمها "x" يعديو فها اختبار رياضيات و ألي يعديو هوما باك مات و علوم و اقتصاد و تصرف ..لهنا انتي تمشي تاخو برنامج الباك متع باك مات و باك علوم و باك اقتصاد و تصرف و تاخو فقط الدروس الموحدة ...ألي يقراوهم الشعب 3 هاذم كهو ....... يعني من الآخر ماكش باش تعدي حاجة مقريتهاش في الباك .
كالعادة كان عندك سؤال اكتبوا في كومنتار لوطا في DISQUS تو تجيني نوتيف ونجم نجاوبك 


2- علاش نعديه أنا الكونكور هذا ونخسر عام ؟
أعادة توجيه ! تشوف روحك ساعة و المستوا متاعك ....ماتحقرش روحك و ما تففاش على بدنك ...يبدا مستواك متوسط أو أقل و تحب تولي طبيب ..!!فيق...تنجم تعمل شعبة أخرى و تفوق فها ... كي تجي تختار ...فما stratégie ...الاختيارات تكون متنوعة ...ماتحتش الاختيارات الكل في فكات تعرف ألي الناس الكل باش تحط فها ...نوع ...التنويع يكون في المجالات و من ثم في الأماكن ...موش الفايدة تقرى في تونس أو سوسة أو بنزرت ...الفايدة تقرى شعبة تعرف روحك تتميز فها ..أخوكم سنا انشاء الله نكمل باك +6 ..و نتخرج مهندس ...و كنت خذيت تجربة كبيرة منذ 6 سنوات في التوجيه و نشوف كيفا الطلبة يختارو و شنوة يتوجهو ...مثال بسيط ISIM صفاقس برشا يحقروها خاطرها في "صفاقس " ، و لكن الفاك هاكي فها هندسة و فها ماجيستير دونك يبدا عندك أكثر chance تطلع مهندس كي تقرا غادي خير ملي تقرى مثال في ESEN منوبة ....حاولو أخرجو من الأرتباط العائلي متع نقرا حذا الدار و الحاجات هاذم ...الزمان هكا سيا وفا مع BAC ..كل واحد تو يتحمل المسئولية متاعو ... الدراسة باش تكون 3 أو 5 أو 6 أو حتى 10 سنوات و بعد ترجع لداركم و الخدمة ربي يسهل ..... ركزو على المجلات حسب profil كل واحد ...فما شكون ينجم يلقى روحو في الأعلامية و لكن ميلقاش روحو في الاقتصاد مثال ....دونك أعادة توجيه راهي آخر فرصة باش تعاود تصلح غلطة التوجيه متع الباك ... و ألي عندو مشكلة متع فلوس يحاول يتصرف من تو خاطر كل كونكور ب 30 دينار ...كيما فسرت في فيديوات ....و المراجعة في أعادة توجيه لازمة .موش تمشي تفرك فاهم و تحب تنجح ....خاطر باش تلقى غيرك فكلك بلاصتك خاطرو ريفز ...
كالعادة كان عندك سؤال اكتبوا في كومنتار لوطا في DISQUS تو تجيني نوتيف ونجم نجاوبك 

3-قداش من إختيار نحط وكيفاش نرتبهم ؟
حسب التجربة أكبر غلطة يعملوها الطلبة في أعادة توجيه ...تلقاه عامل سنة بيضاء أو ماهوش قاعد يمشي يقرا و معمل على الكونكور أما يعدي حاجة مطلوبة برشا و تلقى فها عدد المترشحين كبير كيما الطب مثال ....دونك بعد يلقى روحو مايتقبلش و يخسر عام هكاكا ....دونك الاختيارات في أعادة توجيه تكون متنوعة ، حاجات مطلوبة برشا ،حاجات مطلوبة شوية ، و حاجات ميحطوهاش برشا العباد باش تضمن حاجة ....هكذا يكون الأختيار في أعادة توجيه بالنسبة للعباد ألي معملا عليه ...
كالعادة كان عندك سؤال اكتبوا في كومنتار لوطا في DISQUS تو تجيني نوتيف ونجم نجاوبك 

4-كيفاش نضمن ننجح في الكونكور ونخلط عالحاجة لي نحبها ؟ (ركز مليح في كلامي) 

في التوجيه أو أعادة توجيه بصفة عامة ..يعني وقت اختيار الشعب ...معادش تمشيو بمنطق و لغة "شعبة أساسية خير من تطبيقية " ، " تونس خير من صفاقس " ، "الشعبة .... مافيهاش مستقبل " ، "أما خير الشعبة A أو B-" ألخ من الأسئلة و الأراء ألي مبنية على أحكام مسبقة ...لانو ساعات يجيك طالب يحسب روحو فاهم ..يقلك مثال اجازة أساسية في الأعلامية خير من اجازة تطبيقية ، أو يقلك اللغة مافيهاش مستقبل ألخ ...ترا اسألو قلو فاش خير ؟ و علاش مافيهاش مستقبل ؟؟ و اسألو على التفاصيل تو مايعرفش يجاوب ....في الأختيار مافماش حاجة "باهية " و مفماش "حاجة " خايبة ...فما مجال مطلوب في تونس ، فما مجال مطلوب في المناطق الداخيلية ، فما مجال مطلوب في المناطق الفلاحية ، فما مجال مطلوب في الخارج في أروبا ، فما مجالات ينتفتحو على مجالات أخرى ، فما مجالات تنجم وحدك بيه دبر راسك ، فما طالب ينجم يتفوق في مجال و حاجة أخرى لا ، فما شعبة تنجم تكمل باها هندسة و شعبة لا ، فما شعبة فيها العديد من الأختصاصات في الماجيستير و فما ألي مفيهاش أو محدودة ...قداش عنا من مدرسة دكتورا في تونس ؟ و كيفا تنجم تكمل دكتورا و شكون ألي يكمل ؟ و في أنا مجال ؟ أناهم مجالات الهندسة في تونس ؟ كيفا نكمل ماجيستير ؟ أناهم الفكات ألي فاهم اتفاقيات يخليوك تنجم تقرى في الخارج ..كيفا تنجم تقرا في الخارج على حسابك وفي أنا مجال عندك أكثر chance ، الشعبة الفولانية فها برشا حفيظة و أنا خايب فها دونك أخطاني ، أنا تاعب في المات و الشعبة هاكي كلها رياضيات دونك أخطاني ......ألخ ألخ ألخ .........كيما تشوفو هاذم الأسئلة ألي لازم كل طالب يسألهم و يلوج علاهم و يستفسر ...موش "أما خير تربية الحلاون أو تقليم الأظافر " ..... نختم كلامي بمثال :
طالب تخرج و مشا INSAT سكور متاحها في السماء ...و بعد دوبل خاطر ملقاش روحو أو مقراش أو غيرو من الأسباب دونك خرجوه و بعثوه يكمل يقرا اجازة تطبيقية في الفيزياء ..و نجح بعد مزاد دوبل ...خرج عمرو 25 سنة عندو اجازة في الفيزياء و لا قبلوه ماجيستير و لا شيء .....
طالب واحد آخر ...مشا يقر جغرافيا ..اجازة أساسية ...بعد تفوق في الدراسة متاعو و قبلوه ماجيستير بحث ....كمل تفوق ...و قبلوه دكتورا ...بعد 4 سنوات عدا كونكور و ولا أستاذ جامعي ...أول شهرية مليون و نصف ، و يقري في فاك privé و بشوية بشوية يولي يدخل حتى 4 ملاين في الشهر ...

ملا كي نجحو في الباك زوز الطلبة هاذم قلتولهم INSAT ""خير "" من جغرافيا !!!! مفماش خير ....و ألي يركز في كلامي تو يفهم .

كالعادة كان عندك سؤال اكتبوا في كومنتار لوطا في DISQUS تو تجيني نوتيف ونجم نجاوبك 

5-وين نلقاهم الإكزامانات متاع الكنكورات القدم متاع إعادة التوجيه ؟
ههه نعرف برشا الوجو عليها ، أما مداميك جيت للسيت متاعنا ما تخرج كان بيهم ، هيا إنزل لهنا بش إتنجم إتلشارجيهم 

كالعادة كان عندك سؤال اكتبوا في كومنتار لوطا في DISQUS تو تجيني نوتيف ونجم نجاوبك